IPAK YO‘LI MINTAQALARIDA TURISTLARGA UMUMIY OVQATLANISH XIZMATLARINI RIVOJLANTIRISHDA MILLIY KULINARIYA MEROSI VA EKOLOGIK YONDASHUVLARNING INTEGRATSIYASI

Abstract

Mazkur maqolada Ipak yo‘li mintaqalarida, xususan O‘zbekiston misolida, turistlarga ko‘rsatiladigan umumiy ovqatlanish xizmatlarini rivojlantirish masalasi tahlil qilinadi. Tadqiqotda asosiy e’tibor ikki yo‘nalishga — milliy kulinariya merosini saqlash va ekologik yondashuvlarni xizmat ko‘rsatish tizimiga integratsiya qilish masalalariga qaratilgan. Amaliy kuzatuvlar va mavjud tajribalar shuni ko‘rsatdiki, gastronomik merosni rivojlantirish hamda “yashil” xizmatlar konsepsiyasini joriy etish ko‘pincha bir-biridan alohida olib boriladi. Biroq ushbu ikki yo‘nalishni o‘zaro uyg‘unlashtirish hududiy turizm samaradorligini oshirish uchun muhim imkoniyat yaratadi. Shu nuqtai nazardan tadqiqot davomida gastronomik turizmning mazmuni, an’anaviy ovqatlanish xizmatlarining raqobatbardoshligini belgilovchi omillar hamda ekologik gastronomiya amaliyoti tahlil qilindi. Tahlillar asosida hududiy ovqatlanish tizimini takomillashtirishga qaratilgan integratsion model taklif etildi. Model gastronomik brending, mahalliy mahsulotlardan foydalanish, ekologik xizmatlar va turist tajribasi o‘rtasidagi bog‘liqlikni kuchaytirishga yo‘naltirilgan. Tadqiqot natijalari shuni ko‘rsatadiki, O‘zbekiston sharoitida gastronomik brendingni ekologik yondashuvlar bilan uyg‘unlashtirish turizm samaradorligini sezilarli darajada oshirishi mumkin. Ayrim holatlarda bu ko‘rsatkich 25–40 foiz oralig‘ida bo‘lishi ehtimoli qayd etildi.